Homer's Iliad 1 — Text tables

Text based on: Leaf W. The Iliad. Edited, with apparatus criticus, prolegomena, notes, and appendices. Vol. 1: Books i-xii. 2nd ed. London: Macmillan. 1900.

Generate text table:

Enter entry_id of the first verse in a range

Enter number of the first verse in a range

Enter entry_id of the last verse in a range

Enter number of the last verse in a range

entry_id, number of verse and text of verse
597	1. Μῆνιν ἄειδε, θεά, Πηληϊάδεω Ἀχιλῆος
598	2. οὐλομένην, ἣ μυρί' Ἀχαιοῖς ἄλγε' ἔθηκε,
599	3. πολλὰς δ' ἰφθίμους ψυχὰς Ἄϊδι προΐαψεν
600	4. ἡρώων, αὐτοὺς δὲ ἑλώρια τεῦχε κύνεσσιν
601	5. οἰωνοῖσί τε πᾶσι, Διὸς δ' ἐτελείετο βουλή,
602	6. ἐξ οὗ δὴ τὰ πρῶτα διαστήτην ἐρίσαντε
603	7. Ἀτρεΐδης τε ἄναξ ἀνδρῶν καὶ δῖος Ἀχιλλεύς.
604	8. τίς τ' ἄρ σφωε θεῶν ἔριδι ξυνέηκε μάχεσθαι;
605	9. Λητοῦς καὶ Διὸς υἱός· ὁ γὰρ βασιλῆϊ χολωθεὶς
606	10. νοῦσον ἀνὰ στρατὸν ὦρσε κακήν, ὀλέκοντο δὲ λαοί,
607	11. οὕνεκα τὸν Χρύσην ἠτίμασεν ἀρητῆρα
608	12. Ἀτρεΐδης· ὁ γὰρ ἦλθε θοὰς ἐπὶ νῆας Ἀχαιῶν
609	13. λυσόμενός τε θύγατρα φέρων τ' ἀπερείσι' ἄποινα,
610	14. στέμματ' ἔχων ἐν χερσὶν ἑκηβόλου Ἀπόλλωνος
611	15. χρυσέῳ ἀνὰ σκήπτρῳ, καὶ λίσσετο πάντας Ἀχαιούς,
612	16. Ἀτρεΐδα δὲ μάλιστα δύω, κοσμήτορε λαῶν·
613	17. “Ἀτρεΐδαι τε καὶ ἄλλοι ἐυκνήμιδες Ἀχαιοί,
614	18. ὑμῖν μὲν θεοὶ δοῖεν Ὀλύμπια δώματ' ἔχοντες
615	19. ἐκπέρσαι Πριάμοιο πόλιν, ἐὺ δ' οἴκαδ' ἱκέσθαι·
616	20. παῖδα δ' ἐμοὶ λύσαιτε φίλην, τὰ δ' ἄποινα δέχεσθαι,
617	21. ἁζόμενοι Διὸς υἱὸν ἑκηβόλον Ἀπόλλωνα.”
618	22. ἔνθ' ἄλλοι μὲν πάντες ἐπευφήμησαν Ἀχαιοὶ
619	23. αἰδεῖσθαί θ' ἱερῆα καὶ ἀγλαὰ δέχθαι ἄποινα·
620	24. ἀλλ' οὐκ Ἀτρεΐδῃ Ἀγαμέμνονι ἥνδανε θυμῷ,
621	25. ἀλλὰ κακῶς ἀφίει, κρατερὸν δ' ἐπὶ μῦθον ἔτελλε·
622	26. “μή σε, γέρον, κοίλῃσιν ἐγὼ παρὰ νηυσὶ κιχείω
623	27. ἢ νῦν δηθύνοντ' ἢ ὕστερον αὖτις ἰόντα,
624	28. μή νύ τοι οὐ χραίσμῃ σκῆπτρον καὶ στέμμα θεοῖο.
625	29. τὴν δ' ἐγὼ οὐ λύσω· πρίν μιν καὶ γῆρας ἔπεισιν
626	30. ἡμετέρῳ ἐνὶ οἴκῳ ἐν Ἄργεϊ, τηλόθι πάτρης,
627	31. ἱστὸν ἐποιχομένην καὶ ἐμὸν λέχος ἀντιόωσαν.
628	32. ἀλλ' ἴθι, μή μ' ἐρέθιζε, σαώτερος ὥς κε νέηαι.”
629	33. ὧς ἔφατ', ἔδδεισεν δ' ὁ γέρων καὶ ἐπείθετο μύθῳ,
630	34. βῆ δ' ἀκέων παρὰ θῖνα πολυφλοίσβοιο θαλάσσης.
631	35. πολλὰ δ' ἔπειτ' ἀπάνευθε κιὼν ἠρᾶθ' ὁ γεραιὸς
632	36. Ἀπόλλωνι ἄνακτι, τὸν ἠύκομος τέκε Λητώ·
633	37. “κλῦθί μευ, ἀργυρότοξ', ὃς Χρύσην ἀμφιβέβηκας
634	38. Κίλλάν τε ζαθέην Τενέδοιό τε ἶφι ἀνάσσεις,
635	39. Σμινθεῦ, εἴ ποτέ τοι χαρίεντ' ἐπὶ νηὸν ἔρεψα,
636	40. ἢ εἰ δή ποτέ τοι κατὰ πίονα μηρί' ἔκηα
637	41. ταύρων ἠδ' αἰγῶν, τόδε μοι κρήηνον ἐέλδωρ·
638	42. τίσειαν Δαναοὶ ἐμὰ δάκρυα σοῖσι βέλεσσιν.”
639	43. ὣς ἔφατ' εὐχόμενος, τοῦ δ' ἔκλυε Φοῖβος Ἀπόλλων,
640	44. βῆ δὲ κατ' Οὐλύμποιο καρήνων χωόμενος κῆρ,
641	45. τόξ' ὤμοισιν ἔχων ἀμφηρεφέα τε φαρέτρην.
642	46. ἔκλαγξαν δ' ἄρ' ὀϊστοὶ ἐπ' ὤμων χωομένοιο,
643	47. αὐτοῦ κινηθέντος· ὃ δ' ἤϊε νυκτὶ ἐοικώς.
644	48. ἕζετ' ἔπειτ' ἀπάνευθε νεῶν, μετὰ δ' ἰὸν ἕηκε·
645	49. δεινὴ δὲ κλαγγὴ γένετ' ἀργυρέοιο βιοῖο.
646	50. οὐρῆας μὲν πρῶτον ἐπῴχετο καὶ κύνας ἀργούς,
647	51. αὐτὰρ ἔπειτ' αὐτοῖσι βέλος ἐχεπευκὲς ἐφιεὶς
648	52. βάλλ'· αἰεὶ δὲ πυραὶ νεκύων καίοντο θαμειαί.
649	53. ἐννῆμαρ μὲν ἀνὰ στρατὸν ᾤχετο κῆλα θεοῖο,
650	54. τῇ δεκάτῃ δ' ἀγορήνδε καλέσσατο λαὸν Ἀχιλλεύς·
651	55. τῷ γὰρ ἐπὶ φρεσὶ θῆκε θεὰ λευκώλενος Ἥρη·
652	56. κήδετο γὰρ Δαναῶν, ὅτι ῥα θνῄσκοντας ὁρᾶτο.
653	57. οἱ δ' ἐπεὶ οὖν ἤγερθεν ὁμηγερέες τε γένοντο,
654	58. τοῖσι δ' ἀνιστάμενος μετέφη πόδας ὠκὺς Ἀχιλλεύς·
655	59. “Ἀτρεΐδη, νῦν ἄμμε πάλιν πλαγχθέντας ὀΐω
656	60. ἂψ ἀπονοστήσειν, εἴ κεν θάνατόν γε φύγοιμεν,
657	61. εἰ δὴ ὁμοῦ πόλεμός τε δαμᾷ καὶ λοιμὸς Ἀχαιούς.
658	62. ἀλλ' ἄγε δή τινα μάντιν ἐρείομεν ἢ ἱερῆα
659	63. ἢ καὶ ὀνειροπόλον, καὶ γάρ τ' ὄναρ ἐκ Διός ἐστιν,
660	64. ὅς κ' εἴποι ὅτι τόσσον ἐχώσατο Φοῖβος Ἀπόλλων,
661	65. εἴτ' ἄρ' ὅ γ' εὐχωλῆς ἐπιμέμφεται ἠδ' ἑκατόμβης·
662	66. αἴ κέν πως ἀρνῶν κνίσης αἰγῶν τε τελείων
663	67. βούλεται ἀντιάσας ἡμῖν ἀπὸ λοιγὸν ἀμῦναι.”
664	68. ἦ τοι ὅ γ' ὧς εἰπὼν κατ' ἄρ' ἕζετο, τοῖσι δ' ἀνέστη
665	69. Κάλχας Θεστορίδης, οἰωνοπόλων ὄχ' ἄριστος,
666	70. ὃς ᾔδη τά τ' ἐόντα τά τ' ἐσσόμενα πρό τ' ἐόντα,
667	71. καὶ νήεσσ' ἡγήσατ' Ἀχαιῶν Ἴλιον εἴσω
668	72. ἣν διὰ μαντοσύνην, τήν οἱ πόρε Φοῖβος Ἀπόλλων·
669	73. ὅ σφιν ἐὺ φρονέων ἀγορήσατο καὶ μετέειπεν·
670	74. “ὦ Ἀχιλεῦ, κέλεαί με, διίφιλε, μυθήσασθαι
671	75. μῆνιν Ἀπόλλωνος, ἑκατηβελέταο ἄνακτος·

Homer's Iliad 1 — Text tables

Generate text table:

Error occured:

Success!

Logging in...

Logging out...

Login

Logout

Post your comments here.